سخنگوی پولیس غور از بازداشت سه قاچاقچی با مقدار ۱۱۷ کیلوگرام مواد مخدر خبر داده است.
خبرگزاری توانا: مولوی عبدالرحمن”بدری” سخنگوی پولیس غور میگوید: عصر روز گذشته، سه‌شنبه ۱۱ ثور، سه تن از قاچاقچیان موادمخدر که باشنده‌های اصلی ولایت هلمند می باشند، زمانی از سوی نیروهای کشفی پولیس قوماندانی امنیه ولسوالی دولتیار ولایت غور بازداشت شدند، که می‌خواستند، مقدار ۱۱۷ کیلوگرام موادمخدر نوع ایف را به کابل مرکز کشور انتقال دهند.
به گفته او، این قاچاقچیان که این مواد را در یک عراده موتر جابجا کرده بودند از ساحه ولسوالی دولتیار ولایت غور، بازداشت شدند.
براساس گفته‌های مسوولان امنیتی غور در طی سالِ‌جاری نیروهای امنیتی چندین تن را به اتهامِ قاچاق مواد مخدر در مناطق مختلف این ولایت بازداشت کرده‌اند.
